Катерина и Ванчо Маноилови имале интензивна телефонска комуникација се до средината на јануари оваа година, кога таа наеднаш прекинува и повеќе со никого не комуницирале преку телефон, дознава Телевизија 24 од извори на истрагата.

-Според истите извори, во втората недела од јануари тие пет пати се јавиле и во велешката брза помош. Неколку дена подоцна, нивната телефонска комуникација престанува. Зошто барале брза помош? Дали им е пружена и на што се жалеле? На овие прашања не добивме одговор од брзата помош во Велес, се вели во прилогот на Телевизија 24.

„Такви информации можат да се добијат исклучиво по службена должност, само доколку тоа го побараат овластените државни институции“, вели д-р Страхил Тодоров, портпарол на Здравствен дом Велес.

Откако пет дена по наоѓањето на телата министерот за здравство Венко Филипче откри дека кај лешот на жената е најден коронавирус, десетина дена подоцна случај го затвори, бидејќи обдукцијата открила дека мајката и синот починале во март, кога епидемијата во Македонија веќе ја имаше.

Но, информациите до кои во меѓувреме дојдовме, укажуваат дека тоа можеби не е точно. Сепак, ако починале во јануари, дали е можно коронавирусот да бил присутен во земјава многу порано од она што го знаеме. Според вирусологот Никола Пановски, мала е веројатноста за тоа. Тој смета дека најверојатно тестот кај мртвата жена бил лажно позитиван, но наместо да се признае веќе направената, се прават нови грешки.

Во меѓувреме, Андреја Лазаревски, полицаецот од Велес кој беше на увид во станот на мајката и синот, е позитивен на тестот за коронавирус. По неколкудневно тактизирање, министерот Филипче рече дека најдениот вирус кај полицаецот нема никаква врска со вирусот кај починатата.

Завчера, за Телевизија 24 полицаецот Лазаревски рече дека се сомнева дека има коронавирус. Дали тој е „жртвеното јагне“ за да се оправда избрзаната информација за мртвата жена со коронавирус, ќе покаже истрагата, но и тестот за антитела на коронавирус, кој Лазаревски планира да го направи, се заклучува во прилогот на Телевизија 24.

Видео прилогот можете да го погледнете на 24.мк